Nepoznata žena na plaži me pitala šta mi je „TO“ na stomaku

Dogodilo mi se da me, nepoznata žena na plaži, pita šta mi je „TO“ na stomaku. Pod „TO“ je mislila na ožiljak od operacije.

„TO“ mi je neko vrijeme stvaralo komplekse. Počevši od trenutka kada mi je medicinska sestra rekla da „TO“ neće izblijediti, iščeznuti, niti nestati. Ubrzo potom me je „utješila“ idejom da mogu nositi „duboki kupaći“ – i šta me briga, kroz neki poluosmijeh.

Nisam se lako oslobodila tog kompleksa. Stajala bih pred ogledalom i birala onaj jednodjelni kupaći, plašeći se zlonamjernih komentara, tuđih pogleda i još kojeg pitanja:“ A, šta ti je TO?“

Nekako iz ove priče dođoh do jednog zaključka: Žena je ženi vuk.

Nije okej da me pitaš odakle mi „TO“.

Nije okej da me pitaš koristim li kakvu kremu protiv celulita i namjeravam li smršati.

Nije okej da me pitaš kako sam se tako odjednom „osušila“.

Nije okej da me pitaš koliko smo već dugo zajedno i mislim li se udavati.

Nije okej da me pitaš:“Misliš li ti rađati?“

Nije okej da me pitaš od čega mi se upalilo lice i cijedim li bubuljice.

Nije okej da me pitaš kolika mi je plata.

Nije okej da me pitaš što se toliko sređujem.

Nije okej da me pitaš što se toliko šminkam.

Nije okej da me pitaš ništa što ne treba da te se tiče.

Nije okej da te zanima tuđi život, više od vlastitog.

Nije okej. Stvarno NIJE

Jelena Drapić / Olovka piše srcem